Justerer kraftprisen

Frå og med 02. januar 2025 set styret i Årdal Kraftlag opp kraftprisen til 80 øre/kWh for husholdning og fritidskundar. Prisen inkluderer el-sertifikat og MVA.

Grunna ein stigande spotmarknad, som direkte påverkar kraftprisen, ser me oss nøydde til å justere prisen. Spotmarknaden er ein marknadsplass der elektrisitet blir kjøpt og selt for umiddelbar levering. Prisen på elektrisitet i spotmarknaden, kjend som spotprisen, varierer frå time til time basert på tilbod og etterspurnad. Dette inneber at prisen kan endre seg raskt avhengig av faktorar som vêrforhold, produksjon og forbruk. I Noreg er Nord Pool den viktigaste børsen for handel med elektrisitet på spotmarknaden. Her blir prisane fastsette dagleg for kvar time i det komande døgnet, basert på prognosar for forbruk og produksjon.

Den stigande spotmarknaden me opplever no, skuldast i stor grad kaldare vêrforhold som aukar etterspurnaden etter oppvarming. Til samanlikning var snittprisen for januar 161 øre/kWh i 2023, medan den var 113 øre/kWh i 2024. Dette illustrerer korleis vêrforhold kan påverke prisane frå år til år.

Me har som mål å vera den rimelegaste kraftleverandøren i Årdal, og gjennomsnittsprisen vår samanlikna med spotmarknaden viser at me er det. I løpet av 2024 har me justert prisen to gonger, og begge gongene har me sett ned prisen. Med standard variabel pris har me difor føreseielege prisar, som betyr at kundane våre til ei kvar tid veit kor mykje krafta kostar.

Årdal Kraftlag overvaker marknaden kontinuerleg, og skulle det vise seg at prisjusteringa ikkje er i tråd med marknadsutviklinga, har me høve til å justere prisen ned igjen umiddelbart.